هايفتكرنا ازاي

 حاجتين دايما كنت بفكر فيهم، بُكره هايبقى عامل ازاي، و وقتها انا هافتكر انهردا ازاي

و دلوقتي لو فكرت على مقياس اكبر، مصر رايحة فين، و التاريخ هايفتكرنا ازاي

لما كنت باتكلم مع جدي –الله يرحمه- و احس انه مش فاكر كل التفاصيل بس فاكر السمة العامة للموضوع، أو الاحساس اللي كان حاسه وقت حدث معين ف حياته، مكنتش بجمع ان ده الطبيعي، و دايما كنت برمي الغلط على "السن" 

بس دلوقتي و أنا بافكر ف مصر و ازاي تاريخنا هايتكتب من بعد 25 يناير 2011- و لحد الله اعلم امتى-  فهمت ان العيب ماكنش ف سن جدي ولا ضعف ذاكرته مع الوقت، عرفت ان ده هايكون حالنا، ان اللي هانوصله ف الاخر هو المهم، و بكلامي ده مش بقول نتهاون و مش بقول ان اللي بنمر بيه لن يذكر، بس ال انا عايزة اوصلة ان الفكرة الأكبر أهم، ان مهما كان في حاجات بتوقعنا و تشدنا لورا ثورتنا عظيمة و لازم نحافظ عليها كده عشان بعد كده هايتقال حققوا و اصلحوا او افسدوا و دمروا ، و عشان لأول مرة بجد ف ايدنا نسيب علامة و نرجع مكانة و حضارة انا قلقانة، عشان المسؤلية كبيرة ،عشان مصر بلد عظيمة، عشان كلنا عايزين نعدي بيها

 مهما اختلفنا على الطريقة اللي هاتوصلنا انا عارفة اننا هانوصل و على قد ما انا خايفة على بكره –مش منه- على قد ما انا مطمنة على مصر. و لو في حاجة مش مريحاني و مخوفاني من اللي هايحصل هي اني مش عايزة و انا قاعدة مع أحفادي ف يوم اسمعهم بيقولوا على جيلي ثار و حقق و طاش فدمر، مش عايزة لما يذاكروا اللي عملناه يحسوا "ياه، كل ده و موصلوش لحاجة ف الآخر؟" عايزة مصر احسن ليا و ليهم و لولادهم، عايزة ارفع راسي و افضل احكي و احكي و احكي

مش عايزة حد فينا يهد اللي بنيناه بتعب و دم و سهر و قلق...بكفاح و صراع و تخطي صعاب